top of page

Cashless fare ipausab

Cashless fare ipausab  AFCS

Matag balay-patigayon aduna g’yuy Standard Operations Procedure (SOP) para sa mga empleyado ug mga kustomer. Sa mga casino, grabe ilang SOP. Kon ang card dealer wala makabukhad sa iyang palad dihang gi-spread ang midaog nga chips, o nangilkil sa iyang liog nga wala mopakpak daan sa mga kamot niya, sitahon na siya sa Pit Supervisor ug puwede makasohag procedural deviation. Ang Modern Public Utility Vehicles (MPUV) aduna poy SOP o sistema nga dapat ilang sundon. Apan matud pa ni Panta Transportation Chief Executive Officer (CEO) David Kahale, molima ka tuig na lang, wala g’yud sila hingpit motuman niining mosunod: cashless nga pamaagi sa plitehan, pagdumala sa pagpadagan ug uban pa untang buhat mapuslan gamit ang kamoderno sa teknolohiya. May nasilotan ba? Sa usa ka interbiyu, ang presidente sa Federation of Cebu Transport Cooperatives, Ellen Maghanoy, nakapangutana: ‘Ngano kuno nga ang drivers ug mga konduktor mopasakay man gihapog mga pasahero bisag puno ug sobra na sa kapasidad niini? Unya, ang i-remit kunong kuwarta kada adlaw, pareha ra?’ Samtang si CEO Kahale midugang sa pagpasabot nga ang pagpatuman sa Fleet Management System (FMS) ngadto sa mga MPUV nga nagdagan, makahatag og kaayohan sa mga tag-iya’g sakyanan ug mga pasahero. Usa sa mga pamaagi niini mao ang gitawag og Automated Fare Collection System, diin ipaagi na lang sa digital ticketing ang pagbayad-lukat og trip ticket. Dinhi, wala nay masaag nga kuwarta paingon sa laing mga bolsa. Sanglit, ang dunay digital ticket trip ra man ang pasakyon. Cash? No more! Bitaw. Mas maayo nga aduna gyoy SOP o sistema nga maoy ipasunod sa MPUV. Ug kinahanglang hugtanon ang pag-implementar niini. Kay kon pasagdan lang sa mga nagdumala nga adunay mobawog sa nalatid nga patakaran, aw, seguradong duna gyoy makalusot nga binuang. Usab, angay sab hunahunaon ang habig sa mga drayber. Husto ba ilang kita nga sarang adunay ikapalit sa inadlawng panginahanglan sa ilang pamilya? Ikatukod og payag? Ug ikapaedukar sa mga anak? Mao baya ni rason nganong ang mga driver mopasakay gihapog pasahero bisag overload na? Unta, hatagan sab kinig halawom nga paghinuktok sa kadagkoan sa Department of Transportation. Kay kon ang bolsa gutom, magsige gyod kini’g nganga.

Comentários


bottom of page